發現新大陸・初訪公平點炮台山店

發現新大陸・初訪公平點炮台山店
文: Lily Ho
同女性朋友出街,點都會一齊 (window)shopping 一下是常識吧    😝
前排朋友約係炮台山食飯,仲要係正城市花園酒店後面,咁近公平點炮台山店,無理由唔帶佢地上去睇下啫。友人一位係日藉模特兒,一位係藝術家,最鍾意捐窿捐罅搵心頭好。閲物廣,更加看重產品質素多於係咪大品牌。我都好好奇佢地對公平點嘅反應。
一入鋪,佢地超・乎・意・料咁雀躍。對眼無放過任何一個角落之餘,仲問好多問題:「呢個袋係邊到做架」、「個銀包係咩材料」、「嘩條頸巾好靚呀係咪人手做架」,對於產品來源,生產者嘅故事佢地都好有興趣。去過炮台山店嘅朋友都知道,鋪頭一面係黎自亞洲區嘅手工藝品,一面係黎自世界各地嘅食品同護理用品。兩位友人睇睇吓好自然按興趣分開兩邊尋寶。
正當我同藝術家友人談論孟加拉拼布頸巾背後難民婦女生產者嘅故事,沈寂一時嘅模特兒友人突然向我地伸出佢隻手,”Hey they are really nice!” (這些產品很好用)。原來佢CTM護膚品corner默默試,隻左手佈滿唔同嘅cream。😂 “I like this and that very much. They made my hand smooth and soft quickly.”(我很喜歡這支和那支,佢地瞬間令我隻手好滑同柔軟)乾性皮膚嘅佢心頭好係天然堅果油緊緻面霜同天然蘆薈乳木果護手霜。我話佢知支hand cream 有Shea butter同chamomile呀。”No wonder.”(唔怪得之啦)呢個係對產品幾高嘅評價,做佢個行保養皮膚好重要,加上佢觸感細膩,向來對護膚品質素要求高。
一輪興奮後,兩位買左拼布頸巾,礦物粉同其他護理用品。一路走嘅時候,模特友人對於支手霜依然興奮。將對手拼埋,一隻搽左天然乳木果hand cream,令一隻咩都無搽,同我講 “This hand is more shiny and alive. That one is like dead.”佢話搽左hand cream個隻有光澤同埋好有生氣,另外個隻就老啲、偏黃同死氣沉沉。仲講笑話一隻係女人手,另一隻係男人手,可以一人分飾兩角做對手戲😂。開頭我諗燈光咋嘛?但係認真一睇,真係・無・誇・張・好似幫隻手敷左個保濕去暗啞mask咁。
突然發現,我好似都好耐無試過咁認真望下自己對手,照顧一下佢地嘅需要。

 

Please follow and like us:
0
Previous Post
«